I ha mi ine Richtig gwagt u bewegt, woni mr nie so hät chönne erdänke. Ha geng z Gfüu gha, i bi mr „gloubs“ mire neue kommende Rolle us Muetter scho bewusst…
Härzig. Naiv. „Muetig“, hani o scho dörfe ghöre (immerhin weissi iz ou, wieso. Haha). KE PLAN hani gha! Ke Plan, was uf mi zuechunnt. D Schwangerschaft, d Geburt, ds sogenannte 4. Trimester u no vieles meh. Ke Plan cha eim uf so öppis vorbereite. Wüus äbä so ächt isch! Wüus äbä z Läbä isch. Wüus eifach so surreal u wunderschön isch. Bewegend haut! 🙂
Ig bi scho geng ä huere Pfiffä gsi was Abschiede betrifft. Einersits wüui geng z Positive vor Auge wet bhaute, angersits wüui sehr nöch am Wasser boue bi. U darum wähle ig iz wiedermau dr eifacher Wäg. Äs isch kes Adieu, äs isch: „Mä trifft sich uf angere Wäge…“
I wirde geng i Bewegig blibe. U äs het mi gfreut, mi ä Zyt – o we sie nur churz gsi isch – mit de Schwizer Wanderwege dörfe z bewege.
Machets guet! 🙂
Liebi Lara
Mängisch chunnts angers aus me dänkt. Schön, ischs bi dir so guet usecho. Mir wünsche dir u dire Familie aus Guete, versuechet müglechscht viu z schlafe, u wes nid geit, so göht ga wandere – es git ja auerhand Tragmüglechkeite für nes Bébé.
Mir hei die Zyt mit dir zäme gnosse, hei dini Energie und Schlagchraft – ufem Bild si mer ufemne Geschäftsusflug im Lötschetal – sehr gschetzt. Mir fröie üs, di gli wieder z gseh.
D’Wanderblogger
Blog der Schweizer Wanderwege 